عريس بنتي

أنا عندي 3 بنات ربنا يحفظهم، أكبر اتنين فيهم خريجات طب ومتجوزين دكاترة محترمين جدًا بنتي الصغيرة بقى خريجة صيدله واتجوزت واحد محاسب يعني خريج كلية تجارة أنا ووالدها مكنش عندنا أي قبول ليه من الأول ورفضناه تمامًا مش علشان هو تجارة بس ده كان واحد من الأسباب و إحساسنا الداخلي هو اللي خلانا مش مرتاحين ليه خالص مع إن ماديا حالته كويسة عنده شقة وعربية لكن سبحان الله مفيش أي قبول أو راحة نفسية ورفضناه أكتر من مرة

لكن للأسف بنتي تعلقت بيه جدا ولقينا نفسنا قدام الأمر الواقع فقلنا لها خلاص اتجوزيه لو إنتي مصممة بس خليكي عارفة إننا مش موافقين عليه خالص كنا زعــلانين منها جدا لحد يوم كتب الكتاب كنا لسه عندنا أمل إنها تغير رأيها في آخر لحظة لكن تمسكت بيه وبعد كتب الكتاب جِه يكلمنا وقال أنا عارف إنكم مش مكنتوش موافقين عليا بس إيه السبب؟ قلنا له بكل صراحه إحنا مش مرتاحين ليك ومش عايزينك ولو سمحت سيب بنتنا من دلوقتي أحسن قبل الزفاف رد وقال هسيبها لو هي طلبت ده بنفسها ومن هنا بدأت المشاكل بينا وبينه لحد ما اتجوزته

ودلوقتي بقالهم 7 شهور متجوزين، وبنتي حامل الحمد لله. اللي حصل بعد الجواز بقى هو المفاجأة أنا ووالدها اكتشفنا إن جوز بنتنا إنسان قمة قمة قمة في الذوق والأخلاق والاحترام بنتي دايمًا بتقول لي يا ماما عمره ما زعــلني ولا رفضلي طلب وبيشيلني من على الأرض شيل كل اللي بشوفه منه حب وحنان واحترام

المـشكلة بقى إنه معاملته معانا سطحية جدا في السبع شهور اللي فاتوا ما جاش عندنا غير يمكن خمس مرات وحتى لما ييجي يوصل بنتي مبيطلعش البيت سألنا بنتي ليه جوزك مش بيطلع؟ قالت معلش يا ماما. عنده شغل وأنا هحاول أصالحه عليكم واحدة واحدة حاولنا نعزمه أكتر من مرة مع أزواج إخواتها بس كان بيتحجج بالشغل آخر مرة بنتي جابته بالعافية أكل ومشي بعد خمس دقايق واضح إنه لسه مش قادر ينسى إننا هينا كرامته

أنا معترفة إننا غلطنا في حقه ونفسي العلاقة بينا تتحسن ويبقى زيه زي أزواج إخواتها اللي بيسلموا علينا وبيبوسونا لكن هو عامل حاجز كبير بينا وبينه حتى لما بنزور بنتي في بيتها بيتعمد انه مبيكونش موجود. بنتي بتقولي هو بيحبكم جدا ودائمًا بيقولي إياكي تزعــلي حد من أهلك انا نفسي يبقى طبيعي معانا ونحس إنه قريب مننا بس مش عارفه اعمل كده إزاي بجد كنت أتمنى يكون عندي ولد 1% من أخلاقه واحترامه لمراته