عزال اخويا

النهاردة كان نقل العزال بتاع اخويا
وروحنا انا وماما وكانت العربية وصلت وبيطلعوا الحاجات وطلعنا الشقة
ام العروسة عاملتنا معاملة وحشة جدا وقعدت تقول مجيتكم مالهاش لازمة انا بنتى تفرش براحتها كل ماهتلاقى نفسها فاضية تبقى تفرش وراحت مقفلة ابواب الاوض بالمفاتيح ويلا عشان نقفل الشقة

انا وماما كنا مستنين جوزى عشان يجى ياخدنا فقولت لاخويا انا هستنى بس جوزى يجى وانزل لان الجو شمس اوى بدل مااقف فى الشارع هو مش انت قاعد قالى اه قاعد عشان هجيب نجار يظبط شوية حاجات حتى لو مش هقعد اقعدى براحتك وادانى المفتاح

راحت العروسة وامها دخلوا المطبخ وطلعوا بعد شوية نتشت من ايدى المفتاح وقالت طيب احنا هنقعد لحد ماجوزك يجى ياخدك وبعدين نمشى اصل انا خايفة على حاجات بنتى اصل صاحبة بنتى كان عزالها من كام يوم واتسرق منها حاجات فأنا لازم اقفل الشقة واتمم عليها
حسيت ان ضربات قلبى عليت وفتحت الباب عشان امشى راح اخويا شدنى وقالى تمشى فين دة بيتك دة نص العفش دة بفلوسك يعنى تقعدى وتحطى رجل على رجل وقال لحماته انتى ماتدخليش فى امور شقتى دة بيتى وانا معنديش غيرهم انت فاكراهم حرامية

قالتلو دة بيت بنتى وانا اقول مين يقعد ومين يمشى

قالها لا بالسلامة انت وبنتك
العروسة اتحمقت على ماماتها قالها احنا فيها هكلم العربية تيجى تنزل حاجاتك تانى ومالناش نصيب
انا خدت ماما ومشينا وهو نزل ورانا وسابهم فى الشقة والبنت عمالة تتصل بيه مش راضى يرد عليها واحنا اكيد مش هنرضى الجوازة تبوظ بسببنا
انا وماما عمالين نأنب ضميرنا وقولنا ياريتنا ماروحنا
هو ياجماعة بقا العرف دلوقتى ان اهل العريس مايروحوش عزال ابنهم؟
دة احنا كنا فردين ورايحين واخدين معانا حلويات وبيبسى ومية وكنا عاملين اكل كمان عشان يتغدوا فى شقة ماما

اية الحل العاقل حاليا ؟